भरधाव टँकरची धडक रस्त्यावर पट्टे मारणाऱ्या कामगाराचा मृत्यू सुरक्षेच्या उपाययोजनांवर प्रश्न
PCN Live
संभाजीनगर / प्रतिनिधी - बीड–छत्रपती संभाजीनगर महामार्गावर झाल्टा (ता. छत्रपती संभाजीनगर) गावाजवळ गुरुवारी (५ मार्च) सकाळी भीषण अपघात घडला. महामार्गावर पांढरे साइड पट्टे टाकण्याचे काम सुरू असताना भरधाव वेगाने आलेल्या मालवाहू टँकरने धडक दिल्याने कुंडलिक नवगिरे (वय ४०, रा. पिंपळगाव पांढरी) या कामगाराचा जागीच मृत्यू झाला.
मिळालेल्या माहितीनुसार, महामार्गावरील पट्टे रंगविण्याचे काम एका खासगी कंपनीकडे देण्यात आले असून ते काम ठेकेदारामार्फत सुरू होते. कुंडलिक नवगिरे हे मशीनच्या साहाय्याने रस्त्यावर पट्टे टाकत होते. त्याचवेळी मागून वेगाने येणाऱ्या टँकर (क्रमांक MH 27 DT 4506) ने काम सुरू असलेल्या ठिकाणी जोरदार धडक दिली. या धडकेमुळे मशीन उलटून कामगार काही अंतरावर फेकले गेले.
अपघात इतका गंभीर होता की मशीनचा लोखंडी भाग नवगिरे यांच्या पोटात घुसून मागील बाजूने बाहेर आला. त्यामुळे त्यांचा घटनास्थळीच मृत्यू झाला. या घटनेने परिसरात मोठी खळबळ उडाली असून महामार्गावरील कामगारांच्या सुरक्षिततेबाबत पुन्हा प्रश्न उपस्थित झाले आहेत.
अपघातानंतर परिसरात काही काळ तणावाचे वातावरण निर्माण झाले. मृत कामगाराच्या नातेवाईकांनी संबंधित कंपनी आणि ठेकेदारावर निष्काळजीपणाचा आरोप केला आहे. कामाच्या ठिकाणी कोणतीही योग्य सुरक्षा व्यवस्था नसल्यामुळे हा अपघात घडल्याचे त्यांचे म्हणणे आहे. घटनेनंतर मोठ्या संख्येने नागरिकांनी घटनास्थळी गर्दी केली.
माहिती मिळताच चिकलठाणा पोलिसांनी तात्काळ घटनास्थळी पोहोचून परिस्थिती नियंत्रणात घेतली. मृतदेह शवविच्छेदनासाठी छत्रपती संभाजीनगर येथील शासकीय रुग्णालयात पाठविण्यात आला आहे. टँकर चालकाला पोलिसांनी ताब्यात घेतले असून या प्रकरणाचा पुढील तपास सुरू आहे.
दरम्यान, अपघाताच्या ठिकाणी आवश्यक सुरक्षा साधने उपलब्ध नसल्याचेही समोर आले आहे. काम सुरू असल्याची सूचना देणारे फलक, बॅरिकेड्स किंवा वाहतुकीसाठी वेग मर्यादा दर्शविणारे संकेत नव्हते. तसेच कामगारांना हेल्मेट, रिफ्लेक्टर जॅकेट यांसारखी संरक्षक साधनेही देण्यात आली नव्हती, असा आरोप स्थानिकांकडून करण्यात आला आहे.
कुंडलिक नवगिरे हे कुटुंबातील एकमेव कमावते होते. त्यांच्या मागे पत्नी, दोन मुली आणि एक मुलगा असा परिवार आहे. त्यांच्या अकाली मृत्यूमुळे कुटुंबावर दुःखाचा डोंगर कोसळला आहे. शासनाने आर्थिक मदत जाहीर करावी आणि संबंधित कंपनीवर कारवाई करावी, अशी मागणी कुटुंबीयांनी केली आहे.
या घटनेनंतर प्रशासनाने महामार्गावरील सुरू असलेल्या कामांच्या सुरक्षेची तपासणी करण्याचे आदेश दिले आहेत. भविष्यात अशा घटना टाळण्यासाठी कामगारांच्या सुरक्षेबाबत अधिक काटेकोर नियमांची अंमलबजावणी करणे आवश्यक असल्याचे नागरिकांचे मत आहे.
